Christmas Caan ah Thim ding Pathum
Bible Cang thim: “Tuukhal pawl nih ngakchia cu an hmuh tikah amah kong i
vancungmi nih a chimmi kha an chimh hna. Tuukhal pawl nih an chimmi cu a
theimi poah an khuaruah a har dih” (Luke 2: 17-18).
Nihin kan
chan cu IT chan a si caah vawlei hi rang tukin a kal. Hmun kipah
internet le phone hman khawh a si. Laimi hna kan tuhmui cu telephone a
si ti khawh tluk a si cang. Hlan lioah cun Christmas hrawng a hong phanh
cun a ngei deuhmi khrifabuu nih cun loudspeaker kha battery tha nawn in
an bunh. Lam nai deuh khua nih theih khawh ding tiangin hla chuah le
thawngtha hrawm a si. Nihin ahcun loudspeaker canah internet hman a si.
Facebook ah kan duhmi kan post ahcun vawlei cung dihlak thawng i theih
khawh colh a si. A tha hringhran. Jesuh chuahnak hmanthlak ahhin
zeitindah Facebook an rak hman cio? ti kha zoh ti dingah kan sawm hna.
Jesuh a chuahnak hi Matthai le Luke nih an langhter.
Matthai 1
nih hin Jesuh a chuahnak ding hmanthlak kha Mary le Joseph hmangin a
fianter. Anmah hmangin Jesuh a chuahnak ding kha timhlamh a sinak kha a
chim. Matthai 2 le Luke 2 chung tu ahcun Jesuh kha zeitindah an rak
cohlan ti kha a langhter cang. Pa, Pathian nih Jesuh chuahnak kha
Facebook ah a van tar tikah minung phun thum nih an lehning an i dang
cio. Zeitindah an leh?
Pakhatnak: Mifim hna nih Like an pek.
Like cu duhnak, lungtlinak langhtertu a si. Matthai 2: 2: 9-12 ahhin
mifim hna nih Jesuh a chuahnak kongah an cawlcanghnak kan hmuh. V. 11,
Ngakchia kha Mary sin i an hmuh tikah an kun i an biak. A sullam cu kan
siangpahrang na si tinak a si. Siangpahrang cu kun in biak a si. Cu
lawng hlah. An zal khan laksawng an chuah i an pek. Jesuh an cohlannak
cu an laksawng in an langhter. Ngakchia cu kan in duh tiah (Like) an
pek. V. 12 ahcun, Like an tuah dih in lam dang in an tlung ti kha kan
hmuh. Voikhat cu kan hawi pakhat nih like tal cu pek ka hau a ti (Capo
nak in a kan ti hram). Lungtlinnak a langhtertu a si caah a si. Jesuh cu
keimah ca bak ah Bethlehem ah a chuak tihi Like kan pe kho cio hnga
maw?
Pahnihnak: Herod nih cun Dislike a pek. Dislike cu duh
lonak langhternak a si. Matthai 2: 3-8; 13-23 tiang rel tikah Herod nih
Jesuh a duhlonak a langhter. Ngakchia kha thah dingin a kawl. Herod nih
dislike a tuah ruangah Jesuh cu refugee ah a cang. A nunnak himnak ding
caah Egypt ram ah an zam pi. Voikhat cu khua pakhat ah Christmas an
hmang hna. Tlangval cheu khat zuu an ri. A hnuah cun an i si. Pakhat pa
nih amah he ai simi cu namte in a sawh i a thi. Christmas cu tahnak ah a
cang. Jesuh a rat hnawh chan, kan cohlan duh lo (Dislike) kan tuah
ahcun thihnak tiang hnahnawhnak a chuak tawn kho. Herod nih dislike a
tuah caah tahnak a khat. Kum hnih tang ngakchia thah an tuar.
Pathumnak: Tuukhal hna nih cun Share an pek. Luke 2: 8-20 tang rel
ahcun, Tuukhal hna sinah Vancungmi nih Jesuh chuahnak kong an chimmi le
Tuukhal hna nih cawrawl einak kuang ah an va hmuhnak kha fiang tein hmuh
khawh a si. An nih tuukhal hna cu Jesuh an hmuh i an i lawmhnak lawng
khan an ngol lo. V. 17-18 chungah cun an hmuhmi ngakchia kong kha vawlei
cungah an thanh. Cu thawng a theimi hna cu an khuaruah a har dih. An
theihmi le an hmuhmi kha midang an hrawmh hna.
Voikhat cu
facebook ah “Alah is Great” timi kha an tar. Mitam pi nih like an pek.
Mah nih cun a ka lauter ngai. Kan nih hi teh, “Jesus is Wonderful” tihi
kan tar ngam hnga maw ka ti. Mah cucu nunnak facebook ah tar kho usihlaw
cu, Midang zong nih, “Jesus is my Savior” an ti ko hnga dah kaw ka ti
tawn.
Khrihfa nun cu naute Jesuh kha, “So cute, my little
child” tiin Like pek tiang lawng a si lo. Kan cohlanmi, Jesuh kong kha
midang Share tuah bak a si. Jesuh cu amah caah siloin kanmah ca bak ah a
ra. Amah khamh dingah siloin kanmah khamh dingah a si. Amah luatnak lam
kawl ah a si lo, kanmah luatnak ding caah a si.
Biaknak dang
ahcun, minung kha pathian ah an canter. Nain, Khrihfa biaknak cu Pathian
tu kha minung ah a hong cang. Rev. J. Sang Awi nih, “Uico nih mipa a
seh” ti cu thawng a si lo. Uico nih cun mi kha a seh tawn phung a si.
Nain, “Mipa nih uico a seh” ti cu “thawng” a si” a rak ti. Pathian
minung ah a cang ti cu, “Thawngtha taktak” a si. Mah nak thawngtha cu
zeidah a um ti hnga. Cu thawngtha cu kanmah caah a si bantukin midang ca
zongah a si ve. Tuukhal hna nih cun an theihmi, “Thawntha” kha midang
an chimh/hrawmh ve hna. Jesuh nih a kan phurhmi khamhnak thawngtha
hrawmh dingah timhcia kan si cang maw? Tukum Christmas kan hman tikah
hin, Dislike maw na pek lai, Like maw, Share dah na pek lai.
Mah thawngtha hi na duh le na hawikom, le na chungkhat na Share khawh
hna. Na duh le Dislike zong na tuah khawh thiam. Duhthimnak cu kanmah
caah a si.
Hitihin thla rak cam ve:
“Jesuh keimah
khamhnak dingah Van sunparnak kal tak in cawrawl kuang nai thim. Na duh
loning in ka nunnak cungah ka ngaithiam. Midang sinah na ka tlanhnak
thawngtha hrawmh khawhnak caan tha ka pe ko” Amen.
