Salai Van Lian Thang
Mizo miphun luatnak kheltu Laldenga nih ''ka innkang hmih ding
ahhin tifim nih a daih lo ahcun tithur zong ka hman ko lai'' a rak ti. Mizo
miphun himnak le luatnak caah ramkhelnak lam nih a daih lo ahcun thisen
raldohnak lam zong ka hman ko lai, a ti duhnak a rak si.
Kum 20 chung ral a rak tho taktak. Tulio Aizawl vanlawng bualrawn
kamah khin MNF dohthlennak ah a nunnak a pemi MNA pasaltha ruhro an khomh an
khomh hna i ''Martyr Thlanmual'' tiah dawh takin an ser. Martyr thisen cu
miphun nunnak thahripi a si.
Chin miphun dohthlennak ruangah nunnak a pemi pasaltha hi 80 leng
an si ve cang lai, kan ti tawn. Zeitikdah an ruhro hi kan khomh ve te lai i;
Hakha khualipi ah ''Martyr Thlan'' dawh tein kan ser ve te hnga, ti khi tuzan
cu ka lung a chuak ngai ko.
Laldenga nihcun ''nunnak
pasarih zong khi va nei ning law kan ram le kan miphun caah ka pek dih ko
hnga'' a rak ti lengah ''politik ah fullstops a um lo'' a rak ti i; a nunnak
dihlak an miphun le an ram caah ngol loin a rak hman dih. London ah a thi i; a
ruak cu vanlawng in an hun tlunpi; Mizoram pumpi nih an tah; India Union
Minister pathum nih a ruak an rak hum: Mizoram Assembly inn hmaiah upatnak
sangbik ''State Funeral'' in sunglawi takin an vui; kumtin 7 July a thihni caan
poahah State Governor le ram hruaitu upa hna nih a thlanlung ah zahnak pangpar
an chiah; a thlanlung ah miphun kan pa ''Mizo Hnampa'' tiah an tial. India
Vuncichoh Pratap Singh nih " hi vawleiah Laldenga bantuk hi an chuak tuk
theng ti lai lo dah'' a rak ti.
Naga miphun luatnak kheltu A.Z Phizo zong ramdang ah a thi ve; a
ruak vanlawng in an rak tlunpi; mipi nih a ruak hi Dimapur in Kohima tiang an
ke bakin an i zawn; Cozah zungpi Secretariat hmaiah an phum; an phum hlan-ah
''hi hi India ram a si maw? A si lo. Naga ram a si'' tiah thangpi in voithum
tiang mipi an au i sunglawi takin an vui. Laldenga le A.Za Phizo hi an ram caah
nunnak dihlak pekin luatnak an khel veve; miphunpa sinak luchinh an chinh veve
hna; ramdang ah an thi veve; sunglawi takin ram pumpi in an ruak an vui veve
hna; cu long a si lo; an thlanlung hrimah ''FATHER OF THE NATION: HERE RESTS
THE MAN WHO GAVE HIS ALL FOR HIS PEOPLE'' tiah an tial veve hna.
Nunnak timi hi man a ngei tuk.
Ram le miphun luatnak caah nunnak a petu pasaltha hna hi tihzah an um i
upattlak hrim cu an rak si ko. Miphun PA dirhmun ah an chiah beh phah hna hi an
phu hrimhrim ko, tiah ka ruah. Nain, tuzan cu khua ka hun ruat. Chin miphun hi
Biaknak lei ahcun ''kan Pa'' ti awk kan ngei ngaingai tawn ko nain, zeiruangdah
''Miphun Pa'' tiah kawh awk set hi kan ngeih khawh rih hna lo timi ka hun ruat
ngai. Naga le Mizo miphun nakcun kan no deuh hlei tung lo; kan miphun kan
puitlin deuh rih lo ruang hna a si sual hnga maw ti zong ka hun ruat. Miphun
kip nih ''PA'' an ngei. Pathian nih kan pe ve hram seh.
